ബ്രെക്സിറ്റ് :നമ്മൾ  മറന്നൊരു വാക്ക്  – UKMALAYALEE

ബ്രെക്സിറ്റ് :നമ്മൾ  മറന്നൊരു വാക്ക് 

Monday 19 November 2018 2:34 AM UTC

കെ.നാരായണൻ

രണ്ടര  വർഷം  മുൻപ് ,കൃത്യമായി പറഞ്ഞാൽ 2016 ജൂൺ പതിനാറിനായിരുന്നു  പൊതു ജന താല്പര്യ പ്രകാരം യൂറോപ്യൻ യൂണിയനിയനിൽ നിന്നും പിന്മാറുവാൻ ബ്രിട്ടൺ തീരുമാനിച്ചത്.

Britain Exit from European Union എന്നതിന്റെ ചുരുക്ക പേരായ ബ്രെക്സിട് എന്ന നാമധേയം നമ്മളിൽ പലരും കേട്ട് തുടങ്ങുന്നതും അപ്പോഴായിരുന്നു.പല വിധമായ രാഷ്ട്രീയ നാടകങ്ങളുടെ താത്കാലികമായ പരിസമാപ്തിയായിരുന്നു അത്.

അന്നതൊരു  വാർത്ത ആയിരുന്നു. എന്നാൽ  നാം അധിവസിക്കുന്ന രാജ്യത്തു നടന്ന  എന്തോ ഒരു സംഭവം എന്നതിനപ്പുറം എന്താണ്  ബ്രെക്സിട് എന്ന് ചിന്തിക്കുവാൻ പോലും ഇതിനോടകം നമ്മൾ മറന്നത് സ്വാഭാവികം.

ബ്രിട്ടണും ,യൂറോപ്യൻ യൂണിയനും: രണ്ടു ലോക മഹാ യുദ്ധങ്ങൾ അവശേഷിപ്പിച്ച തകർച്ചയിൽ നിന്നും  പുതിയൊരു തുടക്കം കുറിക്കാൻ ശത്രുതകൾ മറന്നു ഒരുമിച്ചു നില്ക്കണമെന്ന ആശയം ശക്തിപ്പെടുന്നത് 1950 ൽ ആയിരുന്നു.

ഇതിനെതുടർന്ന്ബെൽജിയം,ജെർമനി,ഫ്രാൻസ്,ഇറ്റലി,ലക്സംബർഗ്,നെതർലാൻഡ് തുടങ്ങിയ ആറ് രാജ്യങ്ങൾ മുന്കൈ എടുത്ത് 1957-ൽ നിലവിൽ വന്ന യൂറോപ്യൻ എക്കണോമിക് കമ്മ്യൂണിറ്റി എന്ന സഖ്യത്തിലൂടെ ആയിരുന്നു ഇന്നത്തെ യൂറോപ്യൻ യൂണിയന്റെ തുടക്കം.

യൂറോപ്യൻ ഇക്കണോമിക് കമ്മ്യൂണിറ്റിയുടെ വിപുലീകരണത്തിന്റെ ആദ്യ പടിയെന്നോണം ഏകീകൃത കസ്റ്റംസ് നിയമം പ്രാബല്യത്തിൽ വരുന്നത് 1968-ൽ ആയിരുന്നു.

ഈ ഒരാശയം  നടപ്പിലാക്കുന്നതിൽ പ്രധാന പങ്കു വഹിച്ചിരുന്ന ബ്രിട്ടണാകട്ടെ നീണ്ട പതിനാറ് വർഷങ്ങൾക്ക് ശേഷം 1973-ൽ എഡ്വാർഡ്‌ ഹീത്ത് പ്രധാനമന്ത്രി ആയിരുന്നപ്പോഴായിരുന്നു യൂറോപ്യൻ സാമ്പത്തിക സമൂഹത്തിന്റെ ഭാഗമാകുന്നത്.

നാളിതുവരെ ഉണ്ടായിരുന്ന മേൽക്കോയ്മയും,പേരും,പെരുമയും  യൂറോപ്യൻ യൂണിയനെന്ന പുതിയൊരു സഖ്യത്തിന് മുന്നിൽ അടിയറവു വക്കുന്നതാണീ തീരുമാനമെന്നും,അത് കൊണ്ട് തന്നെ ബ്രിട്ടന്റെ ഭാവി എന്നന്നേക്കും അനിശ്ചതത്വത്തിൽ ആകുമെന്ന ജന വികാരം

മനസിലാക്കിക്കൊണ്ടും  രണ്ട് വർഷങ്ങൾക്ക് ശേഷം 1975-ൽ അന്നത്തെ ലേബർ പ്രധാനമന്ത്രിയായിരുന്ന  ഹാരോൾഡ്‌ വിൽസൻ ഹിത പരിശോധന നടത്തുകയും 66 ശതമാനം ബ്രിട്ടീഷ് ജനത അനുകൂലമായി പ്രതികരിക്കുകയും ചെയ്തു.

യൂറോപ്യൻ യൂണിയനിനന്റെ അനിയന്ത്രിതമായ  വികസന മാർഗ്ഗങ്ങൾക്കുള്ള ചവിട്ടു പടി  കൂടി ആയിരുന്നു അത്.ബ്രിട്ടന് മേൽ യൂറോപ്യൻ യൂണിയന്റെ പ്രബലതകൾ വർദ്ദിപ്പിക്കുന്നതിന്റെ ആദ്യ പടിയായിരുന്നു 1987 -ൽ നിലവിൽ വന്ന സഞ്ചാര സ്വാതന്ത്ര്യവും,ചരക്കു ഗതാഗതവും അനുവദിച്ചു കൊണ്ടുള്ള സിംഗിൾ യൂറോപ്യൻ ആക്റ്റ്.

തുടർന്നുണ്ടായത് യൂറോപ്യൻ രാജ്യങ്ങൾക്ക് മാത്രമായുള്ള സിംഗിൾ യൂറോപ്യൻ കറൻസി എന്ന ആശയമായിരുന്നു. ആഗോള  സമ്പദ് വ്യവസ്ഥയിൽ അമേരിക്കൻ ഡോളറിന്റെ ആധിപത്യം തടയുന്നതിന്  വേണ്ടി ആയിരുന്നു ഈ തീരുമാനം.

1991-ൽ ഒപ്പ് വച്ച മാശ്ച്രിസ്റ്റ് ട്രീട്ടിയിൽ തത്വത്തിൽ അംഗീകരിക്കപ്പെട്ട തീരുമാനം 1999-ൽ പ്രാവർത്തിക മാവുകയും 2002 ജനുവരി യിൽ അംഗ രാജ്യങ്ങളുടെ ഔദ്യോഗിക വിനിമയ മാർഗമായി യൂറോ മാറുകയും ചെയ്തു

 യൂറോപ്യൻ ധനകാര്യ സഖ്യത്തിലും,യൂണിയനിലും പ്രമുഖ സ്ഥാനമുണ്ടായിരുന്ന ബ്രിട്ടന് മറ്റു രാജ്യങ്ങളുടെ സമ്മർദ്ധത്തിനു വഴങ്ങി താൽകാലികമായെങ്കിലും യൂറോ കറൻസിയുടെ ഭാഗമാകേണ്ടി വന്നെങ്കിലും കേവലം ഒരു മാസത്തിനുള്ളിൽ തന്നെ മറ്റൊരു ഹിത പരിശോധന  ഈ തീരുമാനത്തെ തിരസ്കരിച്ചു.

യൂറോപ്യൻ കറൻസിയെ അനുകൂലിച്ചിരുന്ന ആളായിരുന്നു അന്നത്തെ പ്രധാനമന്ത്രി ജോൺ മേജറെങ്കിലും  എപ്പോൾ വേണമെങ്കിലും സിംഗിൾ കറൻസിയുടെ ഭാഗമാകാമെന്ന  ഉപാധികളോടെ ആയിരുന്നു ബ്രിട്ടൻ ഇതിൽ നിന്നും വിട്ടു നിന്നത്.

യൂറോപ്പിന്റെ വികസനവും,ഏകീകൃത യൂറോപ്പ് എന്ന ആശയവും  പൂർണമായും നടപ്പിലാക്കാനും,പ്രവർത്തനങ്ങൾ സുഗമമാക്കാനും യൂറോപ്യൻ പാർലമെന്റ്,യൂറോപ്യൻ കോർട്ട് ,യൂറോപ്യൻ മോണിട്ടറി യൂണിയൻ,യൂറോപ്യൻ സ്പേസ് ഏജൻസി,യൂറോപ്യൻ കമ്മീഷൻ തുടങ്ങിയ പലതും നിലവിൽ വരികയും ഇവയുടെയൊക്കെ ദൈനം ദിന പ്രവർത്തനങ്ങൾക്കുള്ള തുക അംഗ രാജ്യങ്ങൾ തുല്യമായി പങ്കിടണമെന്നതും,ഇതോടൊപ്പം തന്നെ സാമ്പത്തികമായി പിന്നോക്കം നില്കുന്ന മറ്റു രാജ്യങ്ങളെ സഹായിക്കുവാനും ബ്രിട്ടൻ ഉൾപ്പെടെയുള്ള രാജ്യങ്ങൾ ബാദ്ധ്യസ്ഥരുമാണ്‌.

യൂറോപ്യൻ യൂണിയന്റെ പ്രവർത്തനങ്ങളിൽ ആകൃഷ്ടരായി യൂണിയനിൽ അംഗത്വമെടുക്കുന്ന രാജ്യങ്ങളുടെ എണ്ണം വർദ്ധിച്ചു കൊണ്ടിരിക്കുന്നതും, സഞ്ചാര സ്വാതന്ത്ര്യം അനുവദനീയമായതിനാൽ കുടിയേറ്റം വർദ്ധിക്കുവാനും അതിലൂടെ ,തൊഴിലില്ലായ്മയും,പാർപ്പിട സൌകര്യങ്ങളുടെയും അപര്യാപ്തത നിയന്ത്രണാതീതമാകുമെന്നും ഉള്ളതിനാലാണ് ബ്രിട്ടൻ യൂറോപ്യൻ യൂണിയനിൽ നിന്നും വിട്ടു നില്ക്കണമെന്ന വാദം വീണ്ടും ശക്തപ്പെടുന്നത്.

അതോടൊപ്പം തന്നെ ദേശീയതക്കും, പ്രാദേശികതക്കും  ഊന്നൽ കൊടുത്തു കൊണ്ട് ബ്രിട്ടീഷ് രാഷ്ട്രീയത്തിൽ കടന്നു വന്ന യൂകിപ്പിന്റെ പ്രവർത്തനങ്ങളെ കണ്ടില്ലെന്നു നടിക്കാൻ പറ്റാത്തൊരു സാഹചര്യവും സൃഷ്ടിക്കപ്പെട്ടു.

ബ്രിട്ടൺ യൂറോപ്യൻ യൂണിയനിൽ തുടരണമെന്നും,അതല്ല പിന്മാറണമെന്നും ,പിന്മാറ്റം സാമ്പത്തിക,സാമൂഹിക മേഘലകൾ കൂടാതെ  സാധാരണ ജനങ്ങളുടെ നിത്യ ജീവിതത്തിനു വരെ  ഭീഷണിയാകുമെന്നും,എന്നാൽ ബ്രിട്ടന്റെ ഭരണം ബ്രിട്ടീഷ് ജനതക്കും, ബ്രിട്ടനേക്കാൾ പ്രാതിനിധ്യവും,സാമ്പത്തിക ഭദ്രതയും  ഇല്ലാത്ത അയൽ  രാജ്യങ്ങൾക്കു അവകാശപെട്ടതല്ല എന്നുമുള്ള നീണ്ട കാലത്തെ വാദ  പ്രതിവാദങ്ങൾക്കും,സമ്മർദ്ധത്തിനും വഴങ്ങിയിട്ടായിരുന്നു അന്നത്തെ പ്രധാനമന്ത്രി ഡേവിഡ് കാമറൂൺ വീണ്ടുമൊരു ജനഹിത പരിശോധനക്ക് വഴങ്ങിയതും,ആ ജനവിധി എന്താണന്നു ബ്രിട്ടീഷ് ജനതയും,ലോകവും അറിഞ്ഞ ദിവസം ആയിരുന്നു  ജൂൺ 16 .2016 .

ഹിത പരിശോധന അനുകൂലമല്ലങ്കിൽ പ്രധാന മന്ത്രി സ്ഥാനം ഒഴിയുമെന്നു പറഞ്ഞിരുന്ന കാമറൂൺ വാക്കു പാലിച്ചു കൊണ്ട് തല്സ്ഥാനം  ഒഴിഞ്ഞതും,പുതിയൊരു തെരെഞ്ഞെടുപ്പിനു യു.കെ സാക്ഷ്യം  വഹിച്ചതും ചരിത്രം.

എന്നാൽ യൂറോപ്യൻ യൂണിയനിൽ തുടരേണ്ടതില്ല എന്നതായിരുന്നു പൊതു ജനാഭിപ്രായമെങ്കിലും പലവിധമായ നിയമ കുരുക്കുകളിൽ നിന്നും വിടുതൽ കിട്ടുക എന്നത് അനായാസം  അല്ലായിരുന്നു.

ബ്രിട്ടന്റെ പൊതു താല്പര്യങ്ങൾ സംരക്ഷിച്ചു കൊണ്ടും,അതോടൊപ്പം തന്നെ യൂറോപ്യൻ രാജ്യങ്ങളുമായും,മറ്റു ലോക രാജ്യങ്ങളുമായും  നിലവിലുള്ള വ്യാപാര ബന്ധങ്ങൾ അതേ  പടി  തുടരണം എന്നതുൾപ്പെടെയുള്ള നിയമ കുരുക്കുകൾ അഴിച്ചു മാറ്റാൻ ഇപ്പോഴും ശ്രമങ്ങൾ തുടരുന്നതേയുള്ളൂ.

ജനാധിപത്യ സമ്പ്രദായങ്ങൾ സംരക്ഷിക്കുന്നതിൽ ലോകത്തിനു തന്നെ മാതൃക ആയിട്ടുള്ള ബ്രിട്ടൻ നമ്മൾ മറന്ന ബ്രെക്സിറ് എന്ന കടമ്പ കടക്കാൻ ഇപ്പോഴും കിണഞ്ഞു പരിശ്രമിക്കുന്നു.അതൊരു പക്ഷെ വീണ്ടുമൊരു ഹിത പരിശോധനയിലേക്കോ,പുതിയൊരു പ്രധാന  മന്ത്രിയെ തെരെഞ്ഞെടുക്കുന്നതിലേക്കോ ആയിക്കൂടെന്നില്ല.

CLICK TO FOLLOW UKMALAYALEE.COM