ശ്രീനിവാസന് ഹൃദയ സ്തംഭനമെന്ന് മെഡിക്കല്‍ ബുള്ളറ്റിന്‍: വെന്റിലേറ്ററില്‍ തുടരുന്നു – UKMALAYALEE

ശ്രീനിവാസന് ഹൃദയ സ്തംഭനമെന്ന് മെഡിക്കല്‍ ബുള്ളറ്റിന്‍: വെന്റിലേറ്ററില്‍ തുടരുന്നു

Thursday 31 January 2019 4:09 AM UTC

കൊച്ചി Jan 31: ശാരീരിക അസ്വാസ്ഥ്യത്തെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെട്ട നടന്‍ ശ്രീനിവാസന് ഹൃദയസ്തംഭനമെന്ന് മെഡിക്കല്‍ ബുള്ളറ്റിന്‍. കടുത്ത ശ്വാസതടസ്സത്തെ തുടര്‍ന്നാണ് നടന്‍ ശ്രീനിവാസനെ ആശുപത്രിയില്‍ പ്രവേശിപ്പിച്ചത്.

നിലവില്‍ വെന്റിലേറ്ററിന്റെ സഹായത്തോടെയാണ് അദേഹം ശ്വസിക്കുന്നതെന്നാണ് എറണാകുളം മെഡിക്കല്‍ സെന്റര്‍ ആശുപത്രി പുറത്തിറക്കിയ മെഡിക്കല്‍ ബുള്ളറ്റിനില്‍ പറയുന്നത്.

ശ്രീനിവാസന് ഉയര്‍ന്ന രക്തസമ്മര്‍ദ്ദവും പ്രമേഹവും ഉണ്ട്. ആരോഗ്യനില മെച്ചപ്പെട്ടതായാണ് വിവരം.

ഇന്ന് രാവിലെ കൊച്ചിയിലെ ലാല്‍ മീഡിയയില്‍ വെച്ച് അസ്വസ്ഥത അനുഭവപ്പെട്ട ശ്രീനിവാസനെ എറണാകുളത്തെ സ്വകാര്യ ആശുപത്രിയിലാണ് പ്രവേശിപ്പിച്ചത്.

രാവിലെ കാറില്‍ ഡബ്ബിംഗിനായി എത്തിയതായിരുന്നു നടന്‍. അസ്വസ്ഥത കൊണ്ടു പുറത്തിറങ്ങാന്‍ കഴിയാതായ താരത്തെ അതേ വാഹനത്തില്‍ ആശുപത്രിയിലേക്ക് കൊണ്ടുപോകുകയും ചെയ്തു.

അയാള്‍ കഥയെഴുതുകയാണ് എന്ന ചിത്രത്തിന്റെ തിരക്കഥയുമായി ബന്ധപ്പെട്ട വിവാദത്തില്‍ ശ്രീനിവാസന്‍ കഴിഞ്ഞ ദിവസം കൊയിലാണ്ടി കോടതിയില്‍ ഹാജരായിരുന്നു.

ചിത്രത്തിന്റെ തിരക്കഥ തന്റേതാണെന്ന് അവകാശപ്പെട്ട് സത്യചന്ദ്രന്‍ പൊയില്‍ക്കാവ് എന്നയാളാണ് കോടതിയില്‍ ഹര്‍ജി നല്‍കിയത്. ഫഹദ് ഫാസില്‍ നായകനായ ഞാന്‍ പ്രകാശനായിരുന്നു അടുത്ത കാലത്തായി ശ്രീനിവാസന്റേതായി പുറത്തുവന്ന ഏറ്റവും പുതിയ ചിത്രം.

ഏറെ കാലത്തിന് ശേഷമാണ് അദ്ദേഹം ഏറ്റവും അടുത്ത സുഹൃത്ത് കൂടിയായ സത്യന്‍ അന്തിക്കാടിന്റെ സിനിമയില്‍ അഭിനയിച്ചത്.

CLICK TO FOLLOW UKMALAYALEE.COM