20-Sep-2017

കമല്‍ഹാസന്‍ മുഖ്യമന്ത്രിയെ കാണാനെത്തിയത് ദിലീപിന് വേണ്ടിയോയെന്ന് മാധ്യമങ്ങള്‍

കൊച്ചി Sept 8: ജനപ്രിയ നായകനെ രക്ഷിക്കാന്‍ ചെന്നൈ കേന്ദ്രീകരിച്ചു ഗൂഡാലോചന സംശയിച്ചു മാധ്യമങ്ങള്‍ ഉലകനായകന്‍ കമല്‍ഹാസന്‍ തിരുവനന്തപുരത്തെത്തിയത് ജനപ്രിയ നായകനെ രക്ഷിക്കാനാണെന്നും ഉലകനായകന്റെ അടുപ്പക്കാരനായ കുടുംബനായകന്‍ ഓണക്കോടിയുമായി ജയിലിലെത്തിയത് സന്ദേശം കൈമാറാനാണെന്നും മാധ്യമങ്ങള്‍ പറയുന്നു.
 
തമിഴ്‌നാട് രാഷ്ട്രീയത്തില്‍ കാലെടുത്തുവയ്ക്കാന്‍ ഒരുങ്ങുന്ന കമല്‍ഹാസന്‍ കേരള മുഖ്യമന്ത്രി പിണറായി വിജയനെ സന്ദര്‍ശിച്ചത് സംബന്ധിച്ച പല അഭ്യൂഹങ്ങളും പരന്നിരുന്നു.
 
ഫാസിസത്തിന് എതിരായ പോരാട്ടത്തില്‍ ഒപ്പമുണ്ടെന്ന സന്ദേശം നല്കാനാണ് ഉലകനായകന്‍ വന്നതെന്ന് പറയപ്പെടുന്നു. എന്നാല്‍ കൊച്ചിയില്‍ നടിയെ ആക്രമിച്ച കേസില്‍ ജയിലിലുള്ള ദിലീപിന് അനുകൂലമായി ഭരണതലത്തില്‍ സമ്മര്‍ദം ചൊലുത്താനാണെന്ന് സിനിമക്കാര്‍ക്കിടയില്‍ തന്നെ സംസാരമുണ്ട്.
 
കമലിന്റെ വരവ് ദിലീപിന് സഹായമൊരുക്കാനാണെന്ന് പ്രമുഖ നിര്‍മാതാവ് പറഞ്ഞതായി രാഷ്ട്രദീപികഡോട്ട്‌കോം റിപ്പോര്‍ട്ട് ചെയ്യുന്നു.
 
കമല്‍ഹാസനും ചെന്നൈയില്‍ താമസിക്കുന്ന ഒരു മലയാളം നടനും അടുത്ത സുഹൃത്തുക്കളാണ്. ഇരുവരും ഒന്നിച്ച് നിരവധി സിനിമകളില്‍ അഭിനയിക്കുകയും ചെയ്തിട്ടുണ്ട്.
 
ദിലീപുമായും കമലിന് നല്ല ബന്ധമാണുള്ളത്. ആ സൗഹൃദമാണ് കമലിനെ തലസ്ഥാനത്തെത്തിച്ചതെന്നാണ് സംവിധായകന്‍ പറയുന്നത്.
 
പോലീസും സര്‍ക്കാരും ദിലീപ് കേസില്‍ ശക്തമായ നടപടിയുമായി മുന്നോട്ട് പോകുകയാണ്. ദിലീപിന് അനുകൂലമായി കാര്യങ്ങളുടെ ഗതി മാറ്റുകയാണത്രേ ഉലകനായകന്റെ വരവിന്റെ ലക്ഷ്യം.
 
കമല്‍ വന്നു പോയതിന്റെ തൊട്ടടുത്തദിവസം ഈ കുടുംബനായകന്‍ ദിലീപിനെ ജയിലിലെത്തി കാണുകയും ഓണക്കോടി സമ്മാനമായി നല്കുകയും ചെയ്തിരുന്നു.
 
ദിലീപ് അറസ്റ്റിലായപ്പോള്‍ ‘ആ കുറ്റവാളി’ എന്ന് പരസ്യമായി ദിലീപിനെ തള്ളിപ്പറഞ്ഞ വ്യക്തിയാണ് ജയിലിലെത്തി താരത്തിന് പരസ്യപിന്തുണ നല്കിയതെന്നതും ശ്രദ്ധേയമാണ്.
 
പ്രമുഖ നടന്മാരും സംവിധായകരും ഒപ്പം നിര്‍മാതാക്കളും കഴിഞ്ഞ ഒരാഴ്ച്ചയ്ക്കിടെ ജയിലിലെത്തി നടനെ സന്ദര്‍ശിച്ചതും കാറ്റിന്റെ ഗതി എങ്ങോട്ടാണെന്നതിന്റെ വ്യക്തമായ സൂചനയാണ്.
 
ദിലീപിന് അടുത്തതവണ ഹൈക്കോടതിയില്‍ നിന്ന് ജാമ്യം ലഭിക്കുമെന്ന് അടുത്ത സുഹൃത്തുക്കള്‍ പറയുന്നു. ദിലീപിനുവേണ്ടി അണിയറയില്‍ ശക്തമായ കളികളാണ് നടക്കുന്നത്.


Other stories from this section